WAWILI KORTINI KWA KUKUTWA NA BANGHI YENYE THAMANI YA TZS MILIONI 197

Watu wawili wakazi wa Kijiji cha Kitendeni Wilayani Siha mkoani Kilimanjaro wameshikishwa katika mahakama ya Hakimu mkazi ya Wilaya ya Hai kwa kosa la kupatikana na madawa ya kulevya aina bangi  kilo 197  yenye thamani ya  shilingi  milioni  97.

Akisoma hati ya mashitaka  mahakani hapo mbele ya hakimu mkazi mfawidhi wa Wilaya ya Hai, Denis Mpelembwa, Mwendesha mashitaka wa polisi wa Wilaya ya Siha  Roymax Membe  alisema  watu hao walipatikana na madawa hayo ya kulevya kinyume na kifungu cha sheria namba 12(d)cha udhibiti wa madawa kulevya sura 95 ya mwaka 2002

Membe amewataja watu hao kuwa ni Samweli Melekzedeck  (33) na Melta Kuya ambapo alisema kuwa watu hao walipatika na madawa hayo mnamo Machi 18  mwaka majira ya saa 3 asubuhi  katika kijiji cha Kitendeni katika mazingira ambayo yaliashiria madawa hayo yalikuwa kwa ajili ya biashara

Mwendesha mashitaka huyo aliiomba mahakama  kutowapatia dhamana watuhumiwa hao  kutokana na  kiasi cha madawa hayo kuwa ya thamani kubwa kwani alisema kwa mujibu wa sheria ya menendo wa kesi za jinai mtuhumiwa anapokuwa ametenda kosa lenye kiasi cha fedha zaidi ya shilingi milioni kumi hastahili dhamana.

 

Alifafanua kuwa pamoja na watuhumiwa hao kufikishwa mahakamani hapo upelelezi wa kesi hiyo haujakamilika na kuiomba mahakama hiyo kutaja tarehe nyingine ya kusikiliza kwa kesi hiyo 

Hata hivyo  watuhumiwa wote walikana na shitaka na Hakimu  anayeskiliza kesi hiyo alikubaliana na ombi  la mwendesha mashtaka wa polisi  na kuharisha kesi hiyo hadi Aprili 4 mwaka huu itakapo tajwa tena  na watuhumiwa wapo rumande